El M.C.E.P. (Movimientu Cooperativu d’Escuela Popular) defínese como un coleutivu de persones venceyaes direutamente a la enseñanza que, pente medies d’un trabayu cooperativu, críticu ya investigador, faen por renovar y tresformar la escuela; y ello como forma de collaborar na construcción d’una nueva sociedá. Esi ideal d’escuela ye lo que llamamos ESCUELA POPULAR.

Ye un movimientu sociopedagóxicu que, pola so tradición y estructura, integra tanto no tocante a la formación permanente de los/les asociaos/es como a valores rellacionales ente los/les sos componentes. Nun ye, entós, un coleutivu cenciellamente tecno-pedagóxicu (dedicáu al recicláu de los/les sos socios/es, a la investigación educativa, a la esperimentación de nuevos currículos, a la ellaboración de materiales y diseños nuevos,...); como tampoco ye un grupu cenciellamente rellacional (con un fin que sería cultivar l’amistá y les rellaciones humanes ente la xente,...). Recoyendo los calteres enantes mentaos va más p’allá acentuando la so connotación fundamentalmente sociopedagóxica:

• Por concebir la escuela y el trabayu como dalgo insepartable del entornu social onde s’asitia aquella.
• Porque’l so llabor nun ye esclusivamente pedagoxista.
• Porque los socios centren tamién l’aición fuera del aula.
• Por considerar el so llabor na escuela como un esfuerciu continuáu col enfotu de llograr una sociedá más xusta y armónica.

Autocalificase como movimientu implica la posibilidá d’innovación interna y cambiu, heteroxeneidá, convivir na diversidá de motivaciones y práutiques polítiques, sociales y pedagóxiques; apertura, espardimientu, sustratu pedagóxicu común ente les persones, pero diversidá na concreción práctica y respetu a les diferencies.

El MCEP ye, entós, un movimientu sociopedagóxicu que tien:

• Un ideal que tien como oxetivu: "una escuela popular".
• Una pedagoxía propia: La "Pedagoxía d’Escuela Popular" o "Pedagoxía d’EscuelaModerna", derivación de los plantegamientos básicos freinetianos. (C. Freinet 1896-1966)
• Afitamientu na mayor parte del territoriu del estáu español.

Organizativamente ye una confederación de movimientos d’ámbitu comarcal o territorial distintu, nomaos MCEP de ..., qu’anguaño son 21. Esta Confederación ta coordinada por una Secretaría Confederal, de calter rotativu. Cada MCEP ye autónomu na so organización y funcionamientu.

Cada añu celebra un congresu, momentu d’alcuentru y d’aportación ya intercambiu d’esperiencies, col que actualiza los sos plantegamientos, mesmo nel campu pedagóxicu como social.

A nivel internacional atópase dientro de la F.I.M.E.M. (Federación Internacional de Movimientos d’Escuela Moderna), organización qu’atropa movimientos de calter semeyáu en trenta países.

Si quies ampliar la información al rodiu del nuestru Movimientu pues facelo equí